La Suisse raconte

Jürg Steigmeier erzählt Aargauer Sagen unter der altehrwürdigen Linner Linde:

Deetzmòòl hed im ganze Land e schuurigi Pestilänz gwüetet und au im Döörfli Linn isch e grooss Stèèrbet gsy, as all Taag en äigne Fuurchnecht die Lyche uf Unterbööze hed müesse faare, wo s beerdiget worde sind. Z letscht isch deFuurchnecht sälber am schwaarze Toot verräblet. Z Linn aber isch s groosse stèèrbe witer gange bis nur no äin äinzige Maa uber blibe n isch.

Do i de nööchi vom Doorf, hed er e tüüfs Loch uusgnòò und all die gstoorbne drin begraabe. Sini Frau, d Chind und all die andere us em Doorf.

Will er aber gwüsst hed, ass sich d Seele vo de verstorbne gèrn i Bäum uufhaltet hed er uf s Graab zum Aadenke a die Toote e Linde pflanzt. Und so au graad d Pescht mit i de Lindebaum verbannisiert.

Jòòr spööter – de Aahnebaum isch en groosse und mächtige Baum worde – isch si bis i die hütig Zyt zumene wichtige Ort i de Gegend worde.

Öb unter ire au s Lindegricht abghalte worden isch wo gfeelti Zytgnosse uf ebe es linds Urteil hend dörfe hoffe, weiss mer nümme, aber Land uuf und Land ab hed sich s Volch gèèrn im Schatte vo söttig mächtig bechroonte Lindebäum zum Määrte, Tanze und Hochzyt haa zämegfunde.

Und mängi Frau häd wool vo dem Aahnebaum mit de herzförmige Blätter und em süesse Bluescht über all die Zyt vo de wysse Frau dörfe e Chinderseel in Empfang nèè.